ASM

కలలోనూ

కనిపించిందీ

తనే

అనీ కదా

*

కలా పోలికా

*

ఎలా కన్నాను

తననే

కలలోనూ

నులివెచ్చగా

తెలిస్పర్శలా

గురుతెరిగిలా

గింగిరులలా

ముంగురులలా

తోచని నింగిలా

వాలిన మబ్బులా

తొడిమ తెగిన సంజెలా

వాలని రాతిరి తీగల్లా

మళ్ళీ తననే

కానాలంటే

తన కలే కనాలంటే

ఇలానే

ఇదేలా

కలనే

అడగాలా

మరి విన్నపం చేరేది

తనకా

కలకా

కలలోకీ రాని తనకా

రాలేని కలకా

నిద్దురకా

ఈ దరికా

ఇద్దరికా 

.

కలబందమ్

నేలఉసిరి పరిచిన

పరిచిత దారుల్లోంచీ

కనకాంబరాల రెమ్మలనుంచీ

లిల్లీ కోమ్మల వొంపునుంచీ

కానుగ పూ పుప్పొడినుంచీ

పున్నాగ సొంపు నుంచీ

తాటి శిఖ పింఛాల మీంచి

సంజెలో

ఆమె 

విరబోసుకున్న

బిగి బిరుసు వంకీల జుత్తులోంచీ

సూరీడుని 

తన నీడలోకే

వొంపేసుకుని

అస్తమింపచేజేసుకుంటుంది

*

ఇక అతను

క్రితం లానే

చిక్కుడు తీగల్లో వసించే చీమల్లా

రేకున దాల్చిన మొగిలి గంధంలా

నీరు ఆశించక చనే నాగజెముడులా

నిండా నీరే చవులూరే ఏటి కలబందలా

నింపాదిగా

తీక్షణతో

పిపాసిలా

నిరీక్షణ గురుతెరిగిన భిక్షువులా

ఇప్పటికీ

జాబిలి జాడకే 

తచ్చాడుతున్నాడు

అను దినాన

.

Unfriend not a friend

నీ మిత్రులు నిను కనిపెట్టాలి

నీ శత్రువులు నిన్ను గమనించాలి

 నీ అమిత్రులు నిను కాపు కాయాలి

నీ మిత్రేతరులు నిను ఒక చూపు చూడాలి

నీ కేవల పరిచితులు నీకు దిష్టి తీయాలి

నీ ఆగంతుక మిత్రులు నీవెంట నీడల్లా తచ్చాడాలి

నీ పైకి ఆయుధం విసరబడినప్పుడు

విసిరిన కన్నునీకే తెలవాలి

కొన్నిసార్లు మౌనమూ ఆయుధం కావచ్చు

నీ రక్తం చిందినపుడు

రువ్విన చేతులు నీకే కానరావాలి

 కొన్నిసార్లు నిర్లక్షమూ హంతక చేతులు తొడగవచ్చు

నీ లోతైన గాయాన్ని చేసిన దుండగుడి

మనసు నీవే గురుతెరగాలి

కొన్నిసార్లు మనసు ద్వేషానికి బహువచనం కావచ్చు

ప్రియ మిత్రమా

యుద్ధానికి సంసిధ్ధం అయిన తర్వాత

ఎదురు శిబిరంలో

మిత్రులెవరు

ఎవరు అమిత్రులు

శత్రువులెవరు

ఎవరు బంధువులు

నా ప్రియ మిత్రమా

యుద్ధానికి సిద్ధం అయిన తర్వాత

సంధించడమే తరువాయి

................................................................................................అనంతు

(దెంచనాల శ్రీనివాస్ కు)